ألو معايا أ/ عادل والد الطفل مازن؟
- أيوه يا فندم.. مين معايا؟
أنا تيتشر مُنى من مَدرسة مازن..
- أهلًا بحضرتك, خير.. مازن كويس؟
Mazen is very well, don’t worry
- أؤمري؟
كونجراتوليشن يا فندم.. ابن حضرتك اتخرّج من كي جي تو...
- آه مامته قالتلي, خير إن شاء الله؟
إحنا so proud إن مازن did it.. ..
- وإحنا براود على الآخر إنه خرج من مرحلةِ عُنق الزجاجةِ ومبسوطين إن مازن did it بس يا رب ميكونش وسخلكوا المدرسة...
إحنا بس كنا بنـ communicate مع الـ parents عشان نقولهم على الـ graduation ceremony اللي هيتعمل للولاد..
- سيرموني!! مش دي بتتعمل للعيلة المالكة على حدّ علمي!!!
لا يا فندم ههههههه، دي بنعملها للولاد عشان نقولهم good job..
- تمام، طيب ما تعملوها!!
طيب هنحتاج من حضرتك تشرّفنا في المدرسة عشان تدفع لنا fees الـ graduation ceremony... هو مبلغ رمزي..
- لو كده ممكن أبعته مع الولد عشان مشغول؟
لأ، حضرتك ممكن الولد يضيّع الـ 1000 جنيه بتوع الـcermony ومياخدش باله!!
- 1000 جنيه ؟!!!
آه يا فندم... وفي 400 جنيه للروب اللي هيلبسه.
- روب إيه ؟!! ده كله على بعضه 50 سم!!
أنا اتخرّجت واشتغلت مُعيد في الكلية وكنت مأجّر الروب حضرتك!!! يبقى هشتريه لمازن بأمارة إيه؟!
وفي بس 200 جنيه للكاب بتاع الجراديوشن..
- حضرتك قصدك الزعبوط الأسود اللي شبه بتاع ساحر السيرك ده؟!!
آه يا فندم حاجة زي كده..
- البتاع ده بـ 200 جنيه؟!
آه يا فندم عشان كوالتي تعيش العمر كله، وحبيت أفكر حضرتك إن في parents بيجيبوا gifts لل teachers يشكروهم على مجهودهم ويقولولهم good job...
وإن في parents بيجيبوا هدايا للـ students التانيين عشان يقولولهم good job..
وبيجيبوا للإدارة عشان يقوولولهم good job..
- حضرتك هو أنا متعهّد الـ good job عندكوا واللا إيه؟!!
ما هو ده دور المدرسين!! وأنا دافع آلافات عشان يعملوا الـ good job ده من غير ما أجيبلهم هدية تقولهم good job !!!!!
أوك يا فندم.. هنستنّى حضرتك والأسرة تشرّفونا يوم الخميس الجاي بس أفكر حضرتك إن كل فرد هييجي هيدخل بـ 100 جنيه..
وفي 100 جنيه fireworks وبابلز للأطفال.. عشان يفرحوا..
- طيب مفيش هابي ميل وزنجر سوبريم لبابا وماما؟
لو تحب يا فندم فيه بس ندفع 300 جنيه ههههههههه
- يعني حضرتك الليلة دي داخلالها في كام كده شاكب راكب؟
ليلة؟!! وشاكب راكب؟!!! تقريبا two thousands and half أو three thousands كده ..
- توو ثاوزند أند هاااف أو ثري ثاوزندز!!!!! عشان أقول لواد لسه قالع البامبرز ولسه سايب الببرونة من سنتين good job..
ده أنا ممكن أزود عليهم تو ثاوزند كمان وأدفعله قسط عربيّة!!
عامةً مُتشكر جدًّا على وقت حضرتك ويا ريت تجهزولي ملف الولد عشان هاجي أخده بكرة وأنا بشتري طرطور السيرموني والإسدال بتاع الجرايدويشن.. ولو في هدوم مش نضيفة لما he did it يا ريت تحطوهالي في كيس أرجعهم للمدام تنضفهم !!!